家啲數碼相機越玩越多花臣，小藍差啲都追唔切。好似Samsung都幾有諗頭，啱啱推出嘅全球首創雙LCD顯示屏數碼相機ST550同ST500「MIRROR」，完全針對港女鍾意玩自拍嘅心態。
以前港女揸住部機嘟住嘴反手自拍，睇唔到個芒，啲表情係咪cutie都唔知。三星電子消費電子產品總監Alex話，呢兩部雙屏幕MIRROR數碼相機，用家自拍嗰陣只要用手掂一掂鏡頭側邊嘅1.5吋LCD顯示屏，就會開啟自拍模式嘅畫面；對住個芒，啲pose啱唔啱心水，一目了然。
Samsung另一款新機ST1000就啱晒小藍嘞，Alex話，呢部機係世界首部集Wi-Fi傳送、藍芽2.0無線傳輸、智能影像定位功能Geo-tagging，同埋多媒體網絡分享功能DLNA於一身嘅數碼相機。一機在手，隨時隨地與世界極速連繫。用戶可Wi-Fi上載相片到facebook，或經藍芽即時將照片傳送到手機。內置嘅GPS全球定位系統接收器，經Geo-tagging功能將拍攝地點記錄喺相片度。
用戶又可透過DLNA多媒體網絡分享功能，連接具備DLNA嘅薄屏電視睇相。ST500、ST550、ST1000三部機零售價分別係2,590元、2,990元同3,290元。