美國正在上演一場醫療制度改革大戰，左派與右派鬥個你死我活，雙方拳來腳往，打得十分刺激，所有香港政治化粧師、政治公關與政府宣傳機器，都應該留意，從中偷師，睇吓一位民望甚高、魅力十足嘅總統如何在呢一場宣傳大戰中居於下風，民望一路滑落，竟然低過小布殊在第一任嘅同期。
香港有傳媒專門反對曾特首，美國亦有媒體專門反對奧巴馬，就係白宮眼中嘅右派小報、右派電台talkshow主持人（唔知點解，美國嘅電台清談節目主持人好少係自由派，以保守派居多），仲有最重要嘅──梅鐸旗下之霍士電視台。霍士電視係收費電視，與自由派之MSNBC，CNN爭雄，佔晒上風，於收費電視中收視率最高，呢個台在晚上黃金時間接連三個節目都日日批評奧巴馬，大罵自由派，O'Reily，Hannity，GlenBeck罵得最兇。點解罵人節目，罵一位得票率極高嘅總統都有高收視率？相信美國人仲係有好多人對黑人總統睇唔順眼。
美國人原來幾信陰謀論。有調查話在美國極右派之中，有三分一相信奧巴馬唔係在美國出世嘅，在極左派之中，有三分一相信小布殊老早知悉九一一事件，特登唔公開，以便利用恐怖襲擊作為向伊拉克開戰藉口。即使經濟學大教授、攞諾貝爾獎嘅克魯明亦都講：「目前全力阻止全民醫療保險嘅，就係醫療工業組合與右派宣傳機器，以及容易相信謊言嘅美國選民。」克魯明有此陰謀論想法，就覺得理性辯論係多餘嘅，一定要砌低反對派。而反對派當然亦覺得一定要砌低克魯明呢類人物。醫療涉及所有人嘅健康及利益，於是美國家庭醫生反對專科專家，鄉村醫院反對城市醫院，年青納稅人反對年老退休長者，Wal-Mart（巨企）反對中小企，整個美國為咗醫療改革方案分裂成好多派別，互罵不休，誰也不服誰，共和民主兩黨各自出動宣傳機器，抹黑對方。最好玩嘅，就係共和黨抄襲奧巴馬「師傅」Alinsky之社會活動反抗術，組織選民到民眾大會（townhallmeeting）吵鬧，令民主黨議員失態（霍士電視播完又播）。蔡子強寫《新君王術》第四輯，唔怕冇最新材料。