最近有指謝婷婷唔想同周秀娜同一間公司，怕俾佢搞到cheap晒，所以婷婷最近不停放風想簽新公司，噚日佢喺旺角朗豪坊Dior化妝產品發佈會上話：「我同阿輝（謝霆鋒前助手）冇簽過約，點會解約？之前我係搵過佢幫我接工作，但係冇簽過任何嘢，家我係想簽management，傾緊幾間啦。」
問婷婷係咪嫌棄班o靚模，佢話：「我出嚟嗰時都係做家差唔多嘅工作，我同佢哋唔同market。」婷婷又話今次搵經理人公司，係想多方面發展，嚟緊佢會主力拍戲。馮仁昭記得婷婷曾經咬牙切齒話過唔入行，轉頭又話只係想做模特兒，家咪又係走去拍戲！所以學李珊珊話齋，凡事留一線，真係好有道理。
謝絕英皇中國星
婷婷冇講到傾緊邊幾間公司，但佢話冇傾過英皇同中國星，唔知佢係咪怕同男友安志杰同公司，又或者驚自己好似阿哥謝霆鋒咁簽約變賣身，婷婷話：「係一開始爹哋叫我做乜都唔好簽，佢唔想我辛苦，但家算係大個女，唔需要理爹哋媽咪，但我會尊重佢哋意見。」