立會新丁甘乃威上位一年，自言代價不菲。早前一家三口去歐洲放暑假，老婆同佢講，呢十幾日假期陪個女嘅時間，係過去一年總和，佢聽到都有啲歉意，不過人在江湖，都要家人體諒吓。
甘威女兒新學年升中四，一家歐遊返港，先知道原來今年好難買教科書，日內兩公婆可能要四出幫個女撲書開學。甘威話此行見識歐洲好多城市都有快餐車，又容許街頭賣藝，一般公園都可以打golf同踩BMX單車，建議食環署同康文署效法。
泛民對總辭分歧大，甘威認為社會多啲討論好過一潭死水，但暫時毋須討論辭職人選等細節。至於佢願唔願意辭職，佢嘅講法係民主派議員有冇承擔有迹可尋，如果有需要，一定有人願意辭職。