轆Book：VOLVOV502.0向雙離合出發！

總覺得旅行車永遠散發着一種無可代替嘅魅力，兩條黑色車頂行李架、四四方方嘅長方形車尾，係佢獨有嘅標記，亦係令佢跟房車有階級之別嘅靈魂。外形已勝一籌，實用性更毋庸置疑，特大嘅行李尾廂靈活用途廣，順理成章容易爭取唔同類型嘅人士歡心。不過凡事總有代價，車價貴、耗油量大都係令唔少人卻步嘅原因，若然同你講全新VOLVOV502.0可以解決晒以上問題，你又會唔會心思思想買番架呢？

記者：許維雅
攝影：王文忠
Model：Cherry@Puremodels

至抵價26萬有找

環保、慳油成為近年汽車界發展嘅大方向，瑞典品牌富豪汽車亦不甘示弱，最近推出多款以VOLVO動感車系為名嘅新型號，系列特點係VOLVO首次採用六前速雙離合波箱變速技術，令耗油量減少16%，當中最吸引嘅車款固然係V502.0旅行車。換上全新Powershift波箱嘅V50，利用雙離合器轉檔，轉波直接快捷，減少波箱轉波時嘅動力流失，慳油之餘，行車感覺更暢順。據廠方資料，V50平均油耗約8.1L/100km，計番家油價，即係$1.1/km，實在十分抵玩。2公升直四引擎，輸出145匹馬力、18.9kgm扭力，雖然加速表現唔算太強勁，但一樣感覺爽快靈活。加埋手動+/-撥片，同VOLVO出名軚感一流嘅轉向，入彎出彎實在易控舒服，一啲揸大車嘅感覺都冇。呢部以銀黑色為主題嘅旅行車，外表內櫳設計雖然唔稱得十分豪華，但簡潔乾淨嘅設計感覺年輕，同樣十分討好。買得旅行車都係貪尾廂容量大，放平後排座椅可伸延出1.7米長嘅儲物空間，載貨量有417L，夠實用。最令人心服口服係無將貨就價，全真皮內櫳、免匙、多功能軚盤、高級音響等統統有齊，加入旅行車行列嘅人一定好快倍增。