的士界有種流行講法，就係初入行同替更「碰頭」會好啲，一旗接一旗，生意總比全職司機好。聽落似乎無乜根據，到底點解？以前黃師傅都唔識答，但近日世姪入咗行後，先發覺原來兼職同全職存在根本性分別；首先替更唔似全職咁會一個月埋一次數，生意額高低可以拉扯平均番，所以當晚都會較搏，唔會郁啲就搵隊排等運到，機會自然多。最特別係收工入氣時，老一輩不惜排半粒鐘隊，都要塞喺灣仔入氣站，只因嗰度氣錢全港最平，世姪就話寧願落鰂魚涌個氣站，做成千蚊生意氣錢只係貴十零蚊，半個鐘夠做兩支短旗啦，後生仔果然明白時間就係金錢嘅道理，但佢點諗到，我哋呢班老嘢鍾意排隊，其實係乘機養神唞唞氣啫，邊有可能不停踩足「一個對」吖。
文：黃師傅