謝安琪（Kay）榮升天后後是非纏身，屢被批評唱歌走音的她，前晚到伊館出席中學生聯校歌唱大賽時，更慘遭台下年輕人高呼「收皮，唔好再走音」，令Kay大感尷尬，更強調自己因感冒在身才令演出失準，看來她難以剔除「走音Kay」的稱號。
謝安琪憑一首《囍帖街》囊括年初樂壇多個獎項，不過是非卻隨之而至，除受整容、婚變等傳聞困擾外，最近她和陳奕迅（Eason）的緋聞也搞到滿城風雨，日前更傳出她因在賑災騷上被禁與Eason同場而激動落淚。
只為災民哭
前晚Kay聯同張敬軒、陳偉霆及G.E.M等到灣仔伊館擔任「中學生聯校歌唱大賽2009-SUPERnova」的表演嘉賓，患上感冒的Kay準備獻唱《囍帖街》和《吶喊》時，台下竟然有年輕人高呼大叫「收皮，唔好再走音」，令台上的Kay尷尬萬分，不過她仍繼續獻唱，未知是否心情受影響，演出時也有走音。
事後Kay坦言聽到台下觀眾的提示，她說：「呢啲好意定惡意都好，佢哋都係支持我，做歌手難免有好同唔好嘅狀態，我係有失準，自己把聲有啲破喉，都有唔開心，係好突然嘅事件，不過做歌手係要面對壓力，自己會檢討。」
對於被指在賑災騷後台落淚，Kay解釋當日因為看到災民家破人亡的慘況時，在台上感觸落淚，但她回到後台已收拾心情，她說：「呢啲係無稽之談，啲人將賑災放喺Eason身上，真係無孔不入，其實嗰晚喺台邊見到佢都有打招呼。」至於同場的軒仔也力撐Kay跟張繼聰的感情不會受影響，又替張繼聰不值，他說：「各方面都攻擊佢，佢好有口碑同埋係好爸爸，相信阿聰會用盡方法保護佢太太，佢哋感情係經得起考驗。」
張繼聰懶理
此外，張繼聰前晚現身將軍澳電視廣播城，他指現時事態發展已沒有邏輯：「總之嗰日大家一條心做賑災，即使太太喊都係為災民，我嗰日都有同Eason打招呼，對呢件事自己都冇感覺。」
採訪、攝影：卓寶花