PS3薄版　9．1開賣平售$2,399

人生兩難，莫過於9月1日推出薄版PS3！如果我仲係學生哥，究竟應該通宵排頭位，抑或培養心情迎接第二朝新學期？太吸引喇！話晒香港係全球首賣地，俾你搶到頭位，隨時唔止上頭版，連CNN都要搵你訪問，唔光宗耀祖都幾難！更重要係機價平過上一代，暑期工儲夠錢，肯定焗買！

記者：陳國輝
攝影：楊錦文

薄1/3舊版插水$500

「拎上手，都唔算好輕啫！」多位行家首次親身接觸薄版PS3，都有呢種感覺。或者咁講，上一代實在太笨重，你話今次冇改良過？肯定假嘅！數據會證明一切：以上代80GB為例，嗰陣厚度達98mm，重4.4kg，拎出街直頭好似搬屋咁款；呢次厚度縮減至只有65mm，重量更得3.2kg，縮水三分一唔在講，機面仲由原來鋼琴面換為磨砂面，手感唔同晒！顏色暫時得炭黑一種，官方話未有計劃推出其他顏色。可能覺得，薄版嘅新面貌唔算太吸引，極其量只係個Look換咗少少，激進程度點都唔及當年推出PS2薄版咁爆！今次稍為令Fans安慰嘅，係HDD加大至120GB，話明可以拆殼更換；而手掣亦改用DUALSHOCK3震掣，啱晒玩動作Game嘅朋友。另一方面，SCEH已經喺美國發佈消息，指80GB舊版會跌至299美元，約莫比香港行貨平$500，至於香港SCEH就未公佈任何減價消息。

■雖然話薄咗三分一，但唔算好明顯。

■新舊比拼，除咗質感唔同，連Logo都換咗！

升3.0玩盡Bravia功能

首批主機已升級為Firmware3.0，最值得一提，係某啲分唇只有薄版PS3先能夠做到，呢樣就係結合Bravia電視嘅操作模式。舉例說，今次主機內置BraviaSync，單憑一個電視遙控器，就能夠操控PS3嘅XMB選單（XrossMediaBar），控制佢播片或者聽歌，唔再依賴手掣操作；另外，主機仲增設「SystemStandby」模式，意思係當Bravia電視熄機嗰陣，PS3亦會隨之自動關掉。