天王嫂樂基兒（Gaile）及熊黛林（Lynn）昨日歸位行騷，Gaile返美充電一個月，更充當好友伴娘，優哉游哉。另一邊的Lynn就忙於為新片《葉問2》孭10多磅扮大肚婆，結果拉傷腰骨，連緋聞男友郭富城也不知情，真係有苦自己知。
英國時裝品牌Mulberry昨日在九龍圓方店舉行秋冬騷，正規名模終於歸位，當中有天王嫂樂基兒、熊黛林聯同AmandaS.及陳柏霖女友MandyLieu、戴小奕等強勢行騷。久未露面的Gaile原來返了美國一個月，她說：「返咗美國探屋企人，仲為好友結婚做伴娘，已經係第三次做伴娘，都攞唔到花球。」記者取笑她已婚人士做伴娘，她即笑笑口表示：「我都未結婚。」
生日無慾無求
Gaile明天29歲生日，男友黎明（Leon）明日在廣州開演唱會，問Gaile會否捧場，她說：「應該唔會慶祝，因為香港有嘢做，之前都去過。」問到Leon有甚麼表示，Gaile說：「佢話upto我，自己都好攰，想瞓多啲，都冇乜所謂，同埋都冇乜嘢想要，最緊要身體健康，個個開心。」
熊黛林則忙於在上海趕拍新片《葉問2》，她說：「日日開夜班好辛苦，因為要扮大肚，要孭10幾磅，拍成十幾個鐘冇得拗腰，搞到腰骨痛，之前先睇完醫生要啪骨。」問到她有否告知城城受傷，她說：「冇人知，唔使啦，好少嘢。」問到她會否想生BB，她說：「喺戲入面，有咗BB，老公好錫，都恨生o架，遲啲先。」
黛林包容城城
對於早前城城與舒淇拍戲傳緋聞，Lynn說：「冇乜信唔信，我係女仔都會鍾意佢，唔係都唔會同佢做朋友。」問到她城城已否認與舒淇緋聞，是否向她派定心丸，Lynn說：「唔係，佢對女仔好好，舒淇個人好好，好識照顧人。」
此外，AmandaS.透露身處台灣的家人平安，她說：「台灣一打大風就好有問題，唔似香港打八號風球，仲可以出街蒲同唱K。」Amanda憶述兒時在台灣打風的日子：「我住喺陽明山嘅獨立屋，打風時泳池水打到兩層樓咁高，又返唔到學，出唔到街，成間屋都震晒。」MandyLieu則透露男友的外公外婆都住在台南，她說：「好彩都平安，多謝上天，家柏霖喺上海拍緊戲，9月頭就會同佢一齊返去探佢哋。」
採訪：LawWaiMan
攝影：PangChungYin
