台灣遇上慘重風災，死傷逾千人，令人哀痛之餘，質疑台灣嘅防災與救災能力。馬英九總統與國民黨之形象，必大受打擊，「無能政府」之名，難以除掉，預料今年台灣經濟係咁先，下半年台灣上下之精力，會浪費於內耗，搞不好，可能重演紅軍反貪腐要求陳水扁辭職下台事件，由綠營率領人民上街反庸碌無能，令馬英九政令不出台北。
啱啱遇到一位救災經驗豐富人士，佢去年曾到四川救災，又曾到南亞參與海救災，對各地救災之困難，甚有認識。今次佢冇去台灣，只在香港進行籌款工作，支援台灣同一救災機構。呢位救災S話：「我哋在台灣有分支，已在災場向災民派發必需物資。據我哋所知，救災工作喺台灣好有政治性，有綠藍之分外，又有地區議員與官員爭功，地區官員與中央部門爭權，令到中立非政治機構幾難做。呢種情況非台灣獨有，我哋在南亞國家曾見過不少。只有去年在四川災場，中央政府管得最嚴密，共產黨噃，唔講得笑，其他國家地區就慣咗人人有發言權，人人鍾意講嘢，係好唔同嘅。」台灣仲要加上對兩岸交往敏感，對美國關係敏感，對緊急法敏感，總之樣樣要瞻前顧後，畏首畏尾，溫室裏長大的總統遇上特大天災，竟然呆若木雞，表現不如李登輝。
救災S認為泥石流活埋鄉村，係山泥傾瀉，被大雨沖走所致，佢知道台灣對山坡風險之管理，遠不如香港，台灣人又喜歡貪方便，愛關說，開口埋口講人情，不理法律，政府部門即使發現違章僭建，往往俾議員阻止清拆行動，久而久之，大家隻眼開隻眼閉，冇大天災嘅話，當然平安無事啦，遇上莫拉克颱風就杰撻撻。救災S希望台灣吸取教訓，以後不妨派人嚟香港研究山坡管制，但當前之急就係救災，請大家捐錢救災，唔少機構已展開大型籌款活動，如老友財務N來自台灣，正出錢出力為災民籌款，香港台灣工商協會等等大賣廣告募捐，捐款人可把支票寄往尖沙咀廣東道30號新港中心一座501室「港澳台灣同鄉慈善基金會有限公司」，支票背面註明「台灣88水災募款」，當然亦可以捐款畀紅十字會，救世軍等等機構。