o靚模咁受歡迎，全在於一個「o靚」字，偏偏車就越老越經典，古董味永遠唔會被新潮所掩蓋，本來兩者風馬牛，但新進o靚模Annabella，卻對七十年代經典Celica情有獨鍾，望住架重生後嘅閃亮「黑力架」，滿有熱情咁東摸西坐，兩者居然出奇地夾。
記者：徐影龍
攝影：楊錦文
Model：Annabella@ColonEntertainment
年紀輕輕愛懷舊
知道影古董車，Annabella好有心思咁執番個懷舊Look，二十出頭居然散發出寶珠芳芳嗰種星味。「其實我係澳門人，自細睇慣好多歷史建築，所以對古典懷舊嘢有種莫名嘅親切感。考咗車牌唔夠一年，一得閒就四圍遊車河，最鍾意揸去黑沙環度睇日落，真係好靚好舒服。」唔好講到澳門咁遠，眼前呢架司力架又點睇？「個款好Classic好吸引，喺澳門都未見過，支波棍好長，軚盤又大又幼，好有格調，一啲過時感覺都無，仲要1970年出世，但居然保存到成架新車一樣。」
o靚模誤會喇，事隔39年，邊有可能保存得咁「新鮮」，只係古董發燒車主Ronald不惜人力物力，將架舊車拆散翻新再重組，「我買番嚟只花8萬蚊，反而用咗兩年時間上網，逐件零件Bid返嚟，差唔多用咗17萬。」
驚見機械增壓
舊零件係難搵，但無聽過要使十幾萬咁誇張，「其實貴在人工，為求完美翻新，將架車徹底分解，噴晒油防埋銹先砌番架車，當中嘅工夫大到你唔信，上網搵完整車手冊，仲要老師傅先搞得掂，因為七十年代嘅車好多位都係落碼，唔似家一味靠黐，後生車房仔根本連門柄、電鍍邊點拆都未知，盞整爛架車。」
咪睇架Celica成四張嘢仲老過你同我，骨子裏卻隱藏一副勁偈。「喺日本買返嚟時，車主已經抬咗副1.6LSuperCharger偈落去（機械增壓，如Turbo般瞬間提升引擎爆炸力），由當年約100匹馬力，提升到160匹，仲快過同期嗰部2.0L，不過就要換鉸牙避震、Racing極力子、快波棍、輪胎等去配合，否則架車會頂唔順。」果真老馬都有火。
不一樣的性感
大堆o靚模寫真集同期推出，麻甩如我基本上都消化唔切。睇完「露暈娜」、「FashionBaby」，第三本我最欣賞Annabella嘅《Salala's》，只因書內同樣有齊陽光海灘同泳衣Snapshot，但賣弄嘅唔係舐雪糕噴血相，而係另一股清新少女嘅性感。初遇Annabella，真人性格偏向沉靜斯文，無o靚模嗰種扎扎跳低B味，佢話揸車都係咁慢條斯理，就算澳門人多車多，一樣都係讓人為先。
