好耐冇見過報紙出全彩頁粉紙頭版廣告，即時被捲土重來上市的恒大地產吸引。恒大未上市已新聞多多，媲美當年阿里巴巴（1688）強勢上市。但喺首日三十幾蚊時上阿里飛氈，坐到今時今日仍係半天吊嘅投資者，痛苦回憶仍歷歷在目。
在資金市下，抽新股基本上是投資者不經大腦的指定動作，要諗嘅係首日急升後要沽出定係加碼。消息話，恒大最快下月上市，集資最多117億元。
定價暫時未知，好難講平定貴，但以恒大貴為內地十大發展商唯一未在港上市的概念，招股書未出，睇廣告已見到4大頁都擺唔晒嘅樓盤靚相。唔只盤多，另一賣點係土儲最多，目前坐擁24省市4600萬平方米。雖然足夠6年開發，但公司最近仍殺入石家莊以19.36億元（人民幣．下同）天價買入新地王，地價直逼07年。
咁貴買地，除咗有宣傳效應，亦係上市前的化妝之一。目前恒大土地開發集中二三線城市，特別係城郊地區，集團主席許家印亦話，上市集資後會着力進軍北京、上海市場，即係話將來股東可能要一起追逐地王音樂椅，承擔摸頂風險。
追逐地王 小心摸頂
要個妝化得靚，恒大雙管齊下，整靚土儲之餘，亦大搞23城市項目同日同步促銷造勢。唔單止咁，許家印搞Gimmick亦有一手。出身河南貧困縣嘅佢，未躋身首富之列，即大灑金錢搞體育，據說以三千呎豪宅及過百萬年薪，成功拉攏魔鬼教練郎平加盟恒大職業女排隊。內地職業女排根本未成氣候，最多只能參加全國聯賽，盈利能力成疑，加上郎平上任後並無任何奪標要求，似搞噱頭賣廣告成份居多。
但睇真啲原來呢支排球隊註冊資本高達2000萬元，集訓嘅運動中心用咗兩億興建，並趕緊喺郎教練開工前改建，唔啱用會再起。據講仲會物色國家隊以至巴西、美國等地退休老將，實屬燒銀紙之作。
不過愛高調、講排場亦有助公司人氣。早前旗下酒店開業，除咗影視紅人，彤叔、大劉等亦有到場，可見許家印一早喺香江搭通天地線。
銀彈背後，妝容卸掉，要面對公司真面目的始終係小股東。前車可鑑，阿里的爸爸上市冇耐套現買豪宅，洗頭水大王集資為賣廣告。要投資內地房產，謹慎的投資者記緊熟讀招股書，仲要留意大花筒之使錢文化點影響公司管治。
胡孟青