A股急彈，港股乘勢重上2萬點大關。近期港股一日大升、一日大跌，走勢看似梅花間竹，問題係「攤路」係咪咁易捉？大市成交在升市中再度萎縮，昨日只得572億元，反而跌市時就成交大，散戶要留神。
中國移動（941）上半年純利僅升1.4%，係市場預期下限，而且係十年以來上半年業績最差一次，反映高增長時期過去。
若然係內地市場競爭加大所拖累，未來情況可能更差，事關中國聯通（762）整合後，實力如何仍未露底，雖然市場上也有看好中移動，但星俠則不太樂觀。事實上，在今次大升浪，中移動升得最慢又最尾，日後該股會否仲係大市火車頭，值得思考。
仍有下跌空間
香港中旅（308）日前發出盈警，拖累股價由1.88元急瀉，跌抵1.60元才回穩。
昨隨大市反彈1.9%，收報1.65元，惟整體平均線趨勢疲弱，100日線1.71元水平阻力甚大，不易升破，若失守1.60元跌勢將加劇，暫不宜沾手，後市料考驗250日線約1.45元，到時才考慮買入。
方星俠