特首煲呔下令全民抗毒，政府上下立刻做嘢，硬推校園驗毒搞到滿城風雨，連鎮守邊關嘅緝毒犬都受連累。海關日前被踢爆動員全體45隻緝毒狗影大合照，搞到緝毒冇狗用，噚日再有海關二五向八方報料，指管理層最近落柯打所有緝毒犬延長工時，又取消訓練日，搞到啲狗好久一段時間冇得唞，要拖住疲累身軀執勤。領犬員亦做到隻狗咁，冇足夠時間照顧隻狗拍檔，隨時影響緝毒成效。
密集式緝毒好吃力
其實八方近日都聽到類似消息，其他守邊境關卡嘅紀律部隊人員都睇唔過眼，指海關近日緝毒好緊張，「唔理係乜嘢人，海關都要啲狗去聞，令到啲狗個鼻係咁俾旅客嘅行李撞，長期咁做，好容易撞傷個鼻同勞損，睇見就陰功。」家海關有45隻緝毒犬，應付密集式緝毒好吃力，有人話唔只做到啲狗冇得唞，部份領犬員亦冇晒癮，想調離搜查犬組。
緝毒犬慘遭奴役，知情人士話可能同管理層多數係養狗門外漢有關，只係將啲狗當做工具，唔理狗隻生理同心理狀況。雖然管理層會安排關員受訓照顧狗隻，不過訓練後或會被調去其他單位，學非所用浪費公帑，甚至有傳言緝毒犬被人拳打腳踢，然而上頭懶理，質疑有人包庇。
海關否認不人道對待緝毒犬，強調冇發現有緝毒犬被虐打，又表示所有緝毒犬都有固定編更，出勤期間有小休，工作完畢後亦會有足夠休息時間，並冇緝毒犬因工作過勞而病倒。海關又指近日天氣酷熱，已按漁護署獸醫指示，由7月起暫停戶外體能訓練，直至獸醫認為天氣適合為止，但其他日常例行訓練，好似嗅查毒品能力同較輕巧嘅體能訓練如常進行。
迴避延長工時問題
講到緝毒犬咁優差，不過，海關始終冇回應有冇延長緝毒犬工作時間，亦冇說明執勤同休息時間安排。海關又話對毫無事實根據嘅指控深表遺憾，如有確鑿證據可向部門正式投訴，否則對被投訴一方好唔公平。
mailto:[email protected]