公務員近排成日就薪酬福利問題同政府撐，海事處職工聯盟分會噚日喺部門內貼大字報，抗議部門外判海上清潔服務浪費公帑。分會主席陳耀國話處方派員將工會大字報撕走，擺明打壓工會，佢話由於處方刑毀工會大字報，所以工會今日會報警，並會向勞工處投訴，希望勞工處檢控海事處歧視工會活動。
工會同處方唔係首次交手，早前處方擬將員工候命室改為船隊行動組辦公室，工會批評處方冇諮詢話改就改，剝奪員工權益，要求立法會同公務員事務局介入。陳耀國話同事等候分配工作時，有時要喺候命室食飯，處方收回候命室，同事連食飯地方都冇，「點解會咁對我哋？」海事處則話改動辦公室計劃仍在構思階段，有決定就會通知員方。