艾華遜（AI）要靠Twitter搵班落？越嚟越多體育名人潮玩社交網站Twitter，想知班球員有咩最新消息，上網睇Twitter仲快，我求大俠當然都跟風玩吓啦。睇完搞笑能手「巨無霸」奧尼爾嘅Twitter後，噚日就去咗「戰神」艾華遜嘅Twitter，點知睇完之後，真係搞到我求大俠眼濕濕，皆因勢估唔到生涯場均攻入27分嘅「一代戰神」，竟然要淪落到喺Twitter搵工！
等熱火紐約人山貓回覆
艾華遜上季加盟活塞嘅試驗失敗之後，直接令到呢位01年MVP身價暴跌，而且好多球隊都唔想用一個34歲嘅球員做正選；不過鬥心過人嘅AI堅持要打正選，結果由5月到9月期間，連灰熊同快艇都打退堂鼓，搞到AI有機會加盟嘅球隊大概只得熱火、山貓、紐約人等中游球隊，但等咗咁耐市場都冇反應，AI似乎都要面對現實。
AI近日猛喺Twitter話自己願意轉型，仲話自己已經操到fit爆，就係等緊熱火、紐約人及山貓電話（Waitingforthecall,Charlotte,Miami,NY.），由出道至今都不可一世嘅「戰神」要認低威，令我求大俠同一眾AI迷心傷不已。
望與奧雲睇齊
之不過正面咁諗，艾華遜今次肯放低面子喺Twitter搵工，足證「戰神」嗰團火仲未熄；而家只係欠缺一個證明自己嘅機會；情況就好似之前要經理人攞住32頁履歷，去各大球會搵工嘅英格蘭過氣射手奧雲一樣。
奧雲最終等到英超勁旅曼聯領隊費格遜嘅電話，仲着埋7號波衫，可以話求仁得仁。我求大俠希望艾華遜快啲有班落，最好就去山貓，可以同昔日聯手帶領76人晉級01年總決賽嘅教練布朗故劍重逢，咁嘅結局咪完美囉！