汽車節能係大趨勢，但喺電能車依然喺只聞樓梯響階段，Hybrid混能車就變成不二之選。全新一代Prius250推出短短兩個月，銷量已達全球25萬架，汽車嘅環保潮流明顯勢不可當。我就梗係要順應潮流，同Prius250嚟一次長測，深入了解一下呢個環保新潮流。揸得舒服，再加上慳油慳荷包嘅快樂心情，揸住佢總係覺得個天都靚啲。
記者：許維雅
攝影：陳陶鈞
Model：Kinki@zmodels
手枕中控台轉得更舒適
講到最普及嘅Hybrid混能車，人氣王Prius都算係表表者。新一代Prius250剛剛先喺5月底推出，全球銷量已達25萬架，呢張驕人成績表話畀大家知，更多人已經踏上汽車環保之路。做得長測，呢架揭背混能車仔就梗係「任我魚肉」。首先狂試嘅當然係佢嘅EV、ECO同PowerMode三種駕駛模式，唔使問都知PowerMode係最好力，燈位起步時就最幫到手。以環保模式行車嘅ECOMode同用電驅動嘅EVMode都算十分暢順有力，用EVMode時就連少少引擎聲都無埋，感覺仲特別寧靜。全電子控制嘅無段變速波箱，加速減速入彎自己搞掂晒，對於男仔而言，可能會略嫌少咗啲操控感，但對於怕揸車兼顧太多嘅女仔而言，實在十分方便易用。唯一推吓棍仔嘅地方就係上大斜路，因為以低轉數行車嘅B波表現會更好。全新設計嘅T字中控台，帶來獨立駕駛艙感覺，亦像一個大手枕，明顯覺得轉Mode同使用中控台嘅操控時，更就手舒適。但呢個獨立艙設計就好似搞到身形龐大嘅肥仔攝影師坐得好逼狹，不過原來只係視覺上嘅問題，佢就覺得唔算逼仲幾舒服㖭。
玻璃睇車速最實用
數到Prius250另一大賣點，就係各方面配備都豪華升格，最令人欣賞嘅，係投射顯影屏幕，將車速顯示喺車頭玻璃，了解車速唔使周圍瞄，原來好正。加上軚盤左邊有藍芽免提、音響控制，右邊有行車資訊、螢光幕設定按鈕等配備，夠用有餘。而全球首創嘅觸控追蹤顯示，可以喺屏幕立體顯示雙重資訊，就人人大讚有型靚仔。總括長測之後嘅感覺，呢架車仔的確十分容易操控，我自問技術同一眾「車神」級差九條街，但就無論泊位、Uturn都感覺輕鬆自如，加埋有大手枕嘅舒適承托、電子波棍仔輕力轉波嘅便捷、儲物箱又大又多嘅貼心設計等各方面配合，舒適程度實在好到超晒標，不過如果可以送多個感覺悠閒嘅天窗畀我就更Perfect喇。
規格
引擎：1,798cc直四VVT-i＋同步交流電馬達
馬力：99PS/5,200rpm
扭力：142Nm/4,000rpm
傳動：電子控制無段變速、前驅
售價：$265,000
查詢：皇冠車行（28661020）
