港交所（388）候任行政總裁（CEO）李小加噚日朝早現身港交所，出席寶來台灣卓越50基金（3002）上市儀式，仲由現任CEO周文耀（Paul）親自向記者正式介紹兼影相，交足功課，不過李小加原來係快閃黨，一影完相即揮手鬆人，冇留低半句說話，華華想交換卡片都嚟唔切。
周文耀：交接順利
噚日台灣首隻ETF喺本港掛牌，台灣證交所董事長薛琦由台北飛嚟香港出席上市儀式，阿Paul當然親自恭候，候任CEO李小加亦梗要畀面賀一賀。佢孖住阿Paul周圍同人social，薛琦仲邀請咗李小加參加今年11月或12月，喺台北舉行嘅兩岸三地資本發展論壇。華華見阿Paul同李小加有講有笑，睇嚟兩人都有偈傾。
聽港交所公關講，李小加已正式離開摩根大通，唔係點可以光明正大出席港交所公開活動。問到CEO交接工作進展，阿Paul例牌嗰句，兩人交接順利，外界毋須擔心。佢話李小加會喺10月16號返工，有3個月過渡期，出年1月16號正式上任。
但嗰3個月過渡期有兩個CEO，咁班下屬聽邊個支笛好呢？
李華華
mailto:[email protected]