徐淑敏（Suki）自傳出未婚懷孕後，雖然一直未有承認，但她昨日再被問到懷孕一事時居然默認，表示BB將會是老虎仔。11月中她會於HyattRegencyHotel連擺3日婚宴，稍後會於馬來西亞及新加坡等地再擺酒。
徐淑敏自傳出未婚懷孕之後，更被指今日於新加坡與未婚夫黃浩（Kenny）註冊結婚，但昨日Suki於將軍澳電視廣播城為《TVB周刊》拍攝照片時，否認在新加坡註冊。
「頭兩日擺22圍」
一直否認懷孕的Suki昨日改口風，問到是否懷孕時，她說：「OK喇！第一胎應該會係老虎仔。」意指在明年虎年誕下兒子。Suki昨日表示11月中與Kenny於香港註冊兼擺酒，她說：「11月中會喺Hyatt擺3日，到時會有律師當場註冊，頭兩日會擺22圍，第3日就係同啲好朋友開party，之後都會喺馬來西亞同新加坡再擺酒。」
身懷六甲的Suki自言近日經常睡足15小時以上，對於有指她因懷孕怕見肚，故盡快擺酒，她笑笑口說：「都唔會喇！我家仲瘦咗，都唔敢飲太多奶，怕肥喺個肚度。」
對於未婚夫Kenny於新加坡擁有不少物業，更有意送給她及其家人，Suki說：「未收過乜禮物，我唔會去問人家底，如果佢肯送畀我屋企人，我真係好開心，咁屋企人都會覺得我冇揀錯，我老公住乜我咪住乜囉。」
據知Suki和Kenny看中新加坡聖淘沙一間擁有私人沙灘的單位，Suki說：「我唔知呀！我都冇諗過喺新加坡住。」她自言結婚擺酒的事自己不用太操心，她說：「好彩擺酒唔使我煩，我淨係揀婚紗同負責姊妹團。」
準新郎星洲試菜
Suki表示將會工作至10月底，11月開始正式停工準備婚禮事宜。準新郎Kenny昨日接受本報記者長途電話訪問說：「我去新加坡係傾生意同試菜，因為11月尾喺香港擺完，會再喺新加坡擺幾圍，但註冊會喺香港搞掂啦！」
採訪、攝影：王崇穎