噚日係靚媽鍾麗緹（Christy）嘅39歲生日，馮仁昭要恭喜佢雙喜臨門，因為呢位靚媽宣佈第三度有喜。日前鍾麗緹現身上海錄影瘦身節目，着吊帶闊身長裙嘅佢，明顯發褔不少，不過就心情勁靚，成日笑笑口，最終忍唔住自爆原來已懷孕4個月，好快再做媽咪，唔怪之得咁開心。
鍾麗緹喺節目度自爆做第三任媽咪，佢接受內地傳媒訪問時話：「我想第一次跟你們說，我一個很好的新聞，今天剛剛是4個月懷孕，我現在要等第三個寶寶，我覺得挺開心的。」佢家仲係瘦身公司嘅代言人，佢話公司冇唔准佢生仔，所以令佢好安心咁生。鍾麗緹又話：「因為恢復得好，可以再生多一個，希望今次生個兒子，我覺得現在有可能是天幫我安排了，我覺得已有了兩個女兒，如果可以生一個兒子會更完美。」
三個夠晒數
最後鍾麗緹補充：「我希望BB健康第一，第二是如果是個兒子更開心。」睇嚟鍾麗緹好想幫老公嚴振翔追多個香爐躉，咪睇佢係鬼妹仔性格，佢其實好傳統。有啲內地記者問如果今次再生女係咪再追落去？佢話：「不要了，三個小孩夠了。」
鍾麗緹家有兩個囡囡，一個係同前夫Glen所生嘅Yasmine，二女Jaden係同長居北京嘅現任老公嚴振翔所生，舊年7月先出世，咁快又有咗，鍾麗緹真係努力不懈，努力工作賺人仔外，仲要努力生仔，不過佢話生三個就夠，唔再生喎！