午飯飯局開始未久，中貿林大聲疾呼支持校園驗毒，於是飯局變成「城市論壇」，正反意見紛紜。成班成年人講下一代吸毒，當然以支持曾特首者居多，但驗毒結果出咗嚟之後，如學生真係索K，學校如何是好？是否驅逐學生出校？社工跟進一個猶可，倘有兩個、三個、四個、以至十幾個吸毒學生嘅話，何來三頭六臂，一日四十八小時？難怪社聯發聲，唔支持驗毒。
經濟E就話佢與兒子討論此問題好耐，兒子激烈反對，認為此乃鎮壓行為，政府蝦學生未成年，冇選票喎（其實我哋有選票都冇用，有得選特首咩？）。E小子係讀書良才，冇索K，但佢曾在英基學校就讀，知道晒校園內之E仔氾濫，吸毒情況普遍，學校要理亦理唔嚟。財務M之兒子在國際學校讀書，兒子報告學校大門外有一便利店，每日有不少K仔交易進行，佢好奇怪點解警方唔知，或者知道都無力去掃蕩？
校園吸毒首先係外國學校風氣，傳來香港國際學校，再傳播至本地學校，左丁山唔知道氾濫成點，但根據經濟E、財務M反映兒子嘅意見與觀點，似乎幾嚴重噃，即使校園推行驗毒，找出吸毒學生，都只係解決問題第一步啫，或者係治標不治本，基本上，吸毒係一個教育問題，香港就曾因為毒品交易問題而在一八四二年落在英國人之手，中國輸咗鴉片戰爭，反吸毒不成，遂成為吸毒（食鴉片）大國，卒成為東亞病夫，積弱多年。到咗二十一世紀，吸毒在西方十分流行，成為西方社會嚴重問題，如果中國人再染上此惡習，弊弊都冇咁弊。
大家拗完一輪，結論好老套，就係請大家注重家庭教育，關心子女，灌輸健康意識，係唔係講咗等於冇講呢？不過臨埋單之時，經濟E有貼士提供，好多國際學校提供IB課程，追上世界潮流，似乎相形之下，香港本地學校好落後，但經濟E特別指出：「據不少學生經驗，IB課程之數學課程係花拳腿，得個講字，學生去到一流大學讀經濟學、理工科，就會非常吃力，知道自己數學追唔上。到時候，就知道本地中學畢業生嘅數學實力超級嘞！」