唔少上市公司喺注入新業務或者轉型從事其他行業後會轉名轉Logo。華華噚日發覺改名前叫朗迪國際嘅西伯利亞礦業（1142），佢哋個新Logo有座礦山托住啲英文字，一睇就知佢哋係從事開採煤礦啦！佢哋嘅執行董事招自康（左圖右）話，新Logo係想令散戶明確知道公司未來嘅發展方向。
招自康仲話，集團家積極開拓5月時收購嘅西伯利亞焦煤礦，喺半年後完成首期基礎設施修復後可以正式投產，預期有七成焦煤主要提供畀俄羅斯國內使用，其餘會出口去日本、韓國同中國。雖然集團轉咗型，不過暫時未考慮出售原本嘅數碼電視技術服務業務。