大家成日話同大陸鬥平係冇得做，要鬥就一定要鬥創意，而近年越嚟越着重創意嘅香港品牌佐丹奴（709），就決定加重藥。華華噚日睇到佢哋嘅公佈，話佢間佔地5500方米（大約5.9萬方呎）、位於東莞嘅新設計中心噚日啟用，主席劉國權亦有出席開幕儀式。
劉主席話，佐丹奴原本有個佔地500方米嘅設計中心大約容納70名員工，兩年前開始運作，不過家競爭激烈，實在有需要提升自己。佐記仲話，呢個設計中心可以容納200名設計員，單從人數睇，佢哋嘅創意應該多咗成186%！
其實若果近排行街有細心留意年輕人着衫嘅話，可能會發現好多人着住唔同款嘅「大笑面」T恤，呢個就係佐記出嘅「CheerUup」系列。唔知個設計中心大咗，第時會唔會見到多啲新創意Tee呢？