草泥馬、巴士阿叔、搓mybreast……一段段全城爆笑嘅YouTube短片，一幕幕熱爆網絡嘅社會話題，可以好通俗，亦都可以好藝術。浸大視覺藝術院畢業生李靜嫻用傳統剪紙手作仔，表達香港近年種種笑爆嘴嘅社會現象，創作成藝術作品《浮城》，諷刺時弊。
內地出生、澳門讀幼稚園、香港長大嘅李靜嫻話自己唔多留意新聞，搞啲咁有社會視野嘅藝術，無非都係為咗交功課。佢話自小跟嫲嫲同姑媽住，學過唔少穿繩結之類嘅民間手作，培養出做剪紙一樣嘅耐性。古代剪紙係用來傳遞訊息嘅，結婚會剪個囍字，李靜嫻古為今用，借剪紙傳達年輕人嘅嘻笑怒罵。
贏藝術新秀獎
創作過程中，李靜嫻多咗留意時事，佢話最大得着係明白一個人講嘢要小心啲，事關好多社會熱話都係由講錯一句嘢而起，例如成龍嘅「中國人是需要管的」、陳克勤嘅「搓mybreast」。李靜嫻嘅《浮城》奪得藝術公社主辦傑出藝術新秀獎，佢幅大作中包羅咗吊吊fing嘅唐英年、唔肯派糖嘅曾俊華、爭緊產嘅陳振聰等人物，大家如果想睇吓，可以去土瓜灣牛棚藝術室參觀，展覽至今個月底為止。