生產力促進局總裁馮永業歧視工會罪名不成立，但唔代表可以就此甩身，事關被馮永業講到語帶威嚇嘅工聯會鄺志堅非常勞氣，指馮永業庭上作供講啲唔講啲。馮永業指鄺志堅居中斡旋，目的之一係要鞏固在工聯會內地位，鄺志堅則話有人將自己塑造到成隻純情小羔羊楚楚可憐咁款，但就隱瞞談判期間嘅寸爆嘴臉。鄺大狀噚日同八方重提舊事，激到幾乎爆粗，「你估佢冇兇我哋咩？」
據鄺志堅稱，勞工處曾詢問佢是否願意出庭做控方證人，不過佢認為不宜爆晒談判過程，否則好似好冇義氣，所以sayno，點知會咁大鑊。佢話好多工會兄弟紛紛撐佢，對佢遭人格謀殺好激氣。
可還原對話內容
鄺大狀話感謝兄弟支持，但覺得自己單拖都可以搞掂，噚日向馮永業下戰書，如果對方夠膽，兩人可重組當日講數過程，還原整個對話內容，相信屆時公眾自會發現乜嘢叫「人不可以貌相」咁話。工聯會近年刻意捧新人上位，然而江湖地位需時建立，工聯會黃國健本來想讓新丁潘佩璆頂替佢做立法會公務員及資助機構員工事務委員會主席，由於經驗尚淺，連自己友民建聯都唔畀面佢，現任主席民建聯黃容根自薦坐多一年。