你喺邊度？你做緊乜？你做乜去嗰度？唔好話我知，你唔知我講乜……呢類對白，乃愛情生活中的一部份。你自動投案又好，對方例牌盤查都好，總之回答時越多細節就越過到骨，用呢部M20傳送埋地址地圖畀對方，誠懇到封住對方把口啦！
記者︰陸俊雄
攝影︰周旭文
邊High邊查
咩M20咁巴閉？軍方武器咩？非也！輕觸式智能手機一部，不過特別在由華碩加上專做衞星定位產品服務的Garmin第一次合作推出，係一款以Location-basedServices（LBS）和導航功能做主打的3G機。玩地圖、GPS雖然唔係咩新鮮事，不過佢嘅用法和介面就生活化好多。例如你上網、收電郵或SMS，睇到一段文字當中有個地址，你自要Highlight佢，再按GPS圖示，佢馬上做嘢，等兩至三秒就出晒地圖等位置資訊。而且你仲可以將資訊經SMS、MMS、電郵等，一次過轉寄給朋友，非常實用方便。
超輕機身
M20內建有超過9萬9千個吃喝玩樂與趣點，查找功能玩得幾盡，而外形設計亦不馬虎，不過佢唔屬於大部鋼水十足型，佢係玩超輕巧細部，重量僅得99g，厚度亦只有12.8mm。男生用，老實講，過於輕巧，未算好Touch，用Stylus更方便，磨砂底紅藍兩色亦未必係男生杯茶，好在仲有部全黑色可以諗諗。螢幕2.8吋一般大細喇，不過勝在內置有4GB，有埋300萬像素相機，都好夠玩。
馬上開飯
如果你覺得咁都未夠生活化，唔緊要，佢仲有埋OpenRice搜索功能。唔好同我講你唔識咩係OpenRice，否則我好懷疑你係咪香港人。平日你想安心食新嘢，一定去佢網站睇餐飽。落到手機版，當然介面好唔一樣，佢方便到分好一個個小圖示代表最多好評、中、西餐之類。例如進入最多好評，佢就會一頁畀夠30個你睇，而且地址、電話、地圖、GPS等資訊，一次過查到晒。咁都未夠，佢再有埋交通車費資料，只要係有起點和終點就計算到。例如你身處九龍某處，你想過海，佢會有晒路線，港鐵、巴士、渡輪等不同交通費。你唔想睇港鐵和渡輪價，刪咗佢哋就只剩巴士價，設計相當貼心。
Profile
制式︰3.5GHSDPA
作業系統︰WindowsMobile6.1
螢幕︰2.8"（480×640）
相機︰300萬像素（主）、30萬像素（副）
內置容量︰4GB
重量︰99g
內建地圖︰香港、澳門、廣東
支援︰WLAN802.11b+g、藍芽2.0+EDR
電池︰920mAh
體積︰95.3×52.5×12.8mm
