舊年落選立法會選舉後，周梁淑怡幾乎全面退出政壇，得閒湊吓孫周遊列國都唔知幾happy，有指佢因為同西環未冰釋前嫌而冇隨團遊西藏，佢話純屬笑話，只係唔得閒，旁人不必諸多揣測。
周梁唔得閒嘅其中一個原因，係應承咗有線電視逢星期六晚主持《周梁有請》節目，早前已拍宣傳片，佢話呢個節目雖然會請政治人物接受訪問，不過話題唔會太政治化，只會同嘉賓風花雪月，否則會同另一主持飛哥風格重叠。
今次重出江湖，周梁多得唔少幕後功臣，著名髮型師KimRobinson包辦形象，幫佢set完至潮髮型再執外形，部份服裝則由老友記方剛嘅Toppy集團贊助。9月5號節目頭炮嘉賓暫時要賣關子，但相信唐唐同CY呢啲風頭人物點都走唔甩。