中國移動（941）公佈半年業績前，資金早已散水，近日無論睇成交，定係衍生工具市場資金流向，焦點都集中於炒A股反彈之A50中國基金（2823）及中石化（386），除非業績有特大驚喜，中移動短線仍要坐冷板凳。
短炒回A概念後，中移動又回復「三無」︰無概念、無增長、無升幅。大行紛紛出報告，普遍認為「移動城堡」風光不再，隨着高增長神話過去，盈利將自04年來首次回落至單位數增長。
睇中移動盤數，仲要留意ARPU同EBITDA，大行估分別跌10%，及維持51%水平。上客人數、農村發展等已唔再係着眼點，下半年中移動能否跑出，最關鍵係佢嘅3G策略。
3G推出初期，難免要打減價戰。聯通（762）早喺6月玩半價，並取消國內長途、漫遊及雙向收費，最平月費93元人民幣，雞髀打人牙骱軟，即使中移動3G服務繼續用2G收費，亦難免被打到落花流水。
3G好戲在增值服務
不過齋鬥平唔長遠，玩3G必須有夠「潮」嘅增值服務。日前中移動正式發佈類似蘋果AppStore功能之手機商店MobileMarket（MM），更開放畀個人軟件開發商參與，盈利模式都抄足，係透過用戶下載，再同開發商拆賬。
同蘋果唔同，中移動作為運營商，唔單只賣軟件，喺數據下載的同時亦可產生收入，而軟件亦可應用於不同款式手機上，有別於蘋果只係服務小眾Fans。目前中移動有關服務滲透率高達5億戶，較蘋果足足多5倍，市場發展潛力不容忽視。
講完官方點睇，同聯通iPhone埋身肉搏又點？玩3G係高要求嘅手機「體驗」，即係要配合手機設計，從選購、下載、安裝、運作以至移除，全套服務要一絲不苟，全靠一部iPhone，蘋果先可以擁有一億忠實高消費Fans。中移動又點？店開咗，但唔見代表手機，因為自行研發嘅OPhone仲未打得通。
其次係中國市場特色——科技專才太多，法規執行太少。玩開iPhone一定知，基本上網上已有晒破解版嘅軟件，據了解目前市面有5000個已被盜版。中移動的MM銷售對象包括不同型號手機，如何趕盡殺絕老翻？若然有法子，相信蓋茨都好想知道。結果可能係商店生意麻麻，OPhone又唔夠人砌，賠了夫人又折兵。
胡孟青