中電控股（002）半年盈利倒退42.3%至32.35億元，唔只係早前調低利潤管制下之准許回報影響，海外投資亦觸礁，加上美元上半年弱勢，喺澳洲、印度等地嘅業務，淨係蝕滙水都唔少嘢，所以成績表有個「豬仔印」，比市場預期差。
其實中電盈利超過90%來自本港業務，好彩6月天氣夠熱，追番頭5個月售電量跌嘅影響，令中港售電量只跌0.9%。本地業務飽和係市場共識，隱憂仲包括政府提供電費補貼就快完，大家開冷氣未必咁放肆，下半年本地電力增長唔好有咁大期望。既然無嘢好期待，盈利推動力惟有寄望海外，不過單睇廣西同澳洲業務，顯然有點進退失據。
行家話，昨日中電管理層在記招上多次強調，呢份業績絕對唔差，稍為令人失望只有中國業務要損手。目前中電喺國內嘅投資，廣西係重要試金石，05年開始同廣西水利電力建設集團合力發展防城港燃煤電廠，前年年尾正式投產。點知人算不如天算，呢個當地最大嘅外資項目，投資咗55億元人民幣，竟然成為拖低盈利表現嘅負面DrivingForce。
廣西電廠蝕入肉
話說上半年廣西雨量特多，令當地水電產能滿瀉，加上電煤價格仍高居不下，中電喺價格上冇晒優勢，即使電價調整咗，根本連上升嘅煤價成本都補唔番，點會唔輸到「眼癱癱」。集團話見到7月間廠嘅發電量升番12%，有信心下半年有改善，但當行家問到7月好，係咪代表8月、9月一定得，領導層又話難講喎。廣西表現看似唔好彩，但若喺計劃起初評估多一點當地供電情況先決定機組產量，相信未必要蝕入肉。
澳洲亦見紅，明明旗下TRUenergy仲賺2億元，多咗77%，卻為了持有20%嘅SolarSystems撥備而錄得3.46億元虧損，真係左手來右手去。集團解畫，話呢間太陽能技術開發商融資困難，中電為免攬晒上身，要100%撇咗呢筆數先。雖則話係小心謹慎之舉，實情會唔會驚間嘢會摺埋？
有行家問點解喺內地風電市場參與度咁低，管理層話因為一向堅持謹慎投資原則，加上現時根本無吸引項目可取。但點解可以喺澳洲蝕錢就心甘情願，作為特區能源支柱，又唔大力支持中央搞「風電救國」？到底澳洲太陽能好搵，定係中國風電發展嘅泡泡浴好浸，等相關電企出業績就有分曉。
胡孟青