噚日捷榮咖啡喺尖沙嘴區開嘅第二間概念咖啡店開幕，主席兼行政總裁黃達堂唔單止請咗代言人陳豪嚟剪綵同做咖啡冲調師，即場炮製兩款咖啡畀大家試吓，仲請埋陳永陸同郭思治等證券界人士，一齊嚟試飲。
家陣時興玩Crossover，華華見黃主席請幾位財經界人士嚟撐場，梗係要問吓佢係咪有新搞作或特別推廣，黃主席話，其實同陸叔佢哋識咗好耐，今次係班朋友畀面嚟捧場至真。企喺隔籬嘅陸叔就笑住話，自己雖然冇太太同個女咁識飲咖啡，之不過每日都一定會飲一杯，仲要係幫襯捷榮喺中環嗰間概念咖啡店。睇嚟黃主席直情可以考慮搵埋陸叔做代言人喎！
黃主席仲同華華講未來業務拓展大計，佢話暫時無意將喺新加坡上市嘅捷榮嚟香港上市，不過就計劃年尾進軍廣州，開首間咖啡店，大展拳腳。咁又係，內地嘅發展潛力同空間咁大，難怪咁多企業都要北望神州啦！