英超聯新一季賽事開鑼，球迷在周末又試好唔得閒，四大歐洲聯賽之中，英超雖然未必最精彩，但勝在快上快落，夠刺激。有一點好重要嘅，就係大多數英超比賽都有好多現場球迷入場吶喊，營造氣氛，相比之下，意大利甲組賽事幾乎場場得一半人入座，好似無精打采咁，電視機旁嘅觀眾會覺得悶。仲有，賭波最好賭英超，起碼拳來腳往之下，輸咗唔會賴地硬，賴冇鬥志！
睇完第一輪比賽之後，左丁山認為今季有三隊比較搶眼，可爭冠軍，利物浦、曼城、熱刺會有威脅，其他各隊最多係爭第七名，至於降班三隊，升班馬般尼與狼隊肯定係孖膽，第三隊就難講啲，另一隊升班馬伯明翰似乎有前有後有拼勁，第一場輸畀曼聯冇得好講，表現已經勝過般尼與狼隊好多，啲中下游隊伍如史篤城、侯城、新特蘭、保頓、富咸、樸茨茅夫、布力般流浪等未必一定贏梗伯明翰。
上季前列隊伍愛華頓與阿士東維拉落筆打三更，維拉輸畀韋根零比二，眼見反撲力甚弱，冇咗上季啲衝勁噃，愛華頓仲曳，輸畀阿仙奴一比六，全場捱打，任由阿仙奴魚肉，假如中場靈魂Arteta繼續養傷唔出得場，愛華頓係咁先。
於是只剩番Big3加3，曼聯、車仔、兵工廠加上利物浦、曼城與熱刺。曼城今季大事擴軍，有用不完的石油錢，買入高質素球員，果然有料到，第一場雖然表現麻麻，新配搭欠默契，未曾上力，單憑質素就以二比零擊敗布力般，以後要睇教練曉士嘅功力咯，呢班人合作慣熟之後，曼城與曼聯之打吡戰可以打甩髀，費Sir會面青o架，曼聯小勝伯明翰一比零，球員表現難與阿仙奴班小將相比，少咗Ｃ朗與泰維斯，衞冕有難度噃。利物浦冇咗沙比阿朗素，中場實力下降，要上天庇佑謝拉特成季健健康康至得，雖然BBC認為今季可能係利物浦吐氣揚眉之時，左丁山就認為車路士係攔路虎，強隊中以車路士平均年齡最高，相信今季之後就會走下坡，但今季勝在經驗豐富，合作慣熟，水準唔會大上大落如阿仙奴，絕對有機會問鼎冠軍寶座，熱刺贏得利物浦，並非善類，贏冠軍難啲咯。