係人都知香港車神「盲亨」同香港啲警察水溝油，估唔到迪科爾都同佢一樣。呢位效力英超熱刺嘅英格蘭國腳前鋒，同英國警方都唔知係咪前世撈亂骨頭，佢哋之間有數之不盡嘅恩怨，而且仲極之戲劇性，唔知仲以為係拍緊電視劇㖭。
告英國警方種族歧視
唔少英超球星都鍾意揸快車，迪科爾亦唔例外，仲多次超速被捕，結果喺今年7月頭被釘牌半年，而佢喺英國警方眼中更係個積犯。但佢唔服氣，搵個專打超速嘅律師上訴。其間佢可以照揸車，點知喺7月27號俾差人以無牌駕駛罪名拘捕，雖則佢解釋自己搞緊上訴，但啲差人就係唔信，令到佢喺拘留所踎咗成晚，兼且趕唔切上機，咁就錯過咗熱刺嘅中國之旅。
事後證實係一場誤會。英國警方因為電腦系統冇更新迪科爾嘅資料，結果先拉錯咗佢。但迪科爾越諗越唔順氣，喺同律師商量完之後，決定喺8月14號告英國警方種族歧視，話對方因為佢係黑人而處處針對佢。點知佢轉個頭又俾英國警方！
探完阿媽再俾人
話說禮拜日晚迪科爾探完阿媽之後揸車返屋企，俾警察截查。英國警方話，當晚佢哋正進行反盜竊同偷車行動，截停迪科爾檢查係屬於例行程序，但迪科爾就唔接受英國警方嘅解釋，話對方擺明玩針對。
迪科爾嘅代表律師費文咁講：「迪科爾當時從佢阿媽屋企離開，警方根本冇截查理據。」我求大俠唔排除英國警方同迪科爾玩嘢，但佢多次超速，點計都係唔着。更何況廣告都有話「超速害人、影響一生」，一個唔覺意好似前普利茅夫門將麥哥米克同埋諾士郡前鋒李爾曉士咁，之前因超速車死人而搞到入冊，前途盡毀，咁就唔好啦。希望迪科爾佢好自為之啦！