橋牌係鍛煉腦筋活動，已故鄧小平都係高手，上有好者，下必甚焉，因此中國橋牌水平十分高。香港橋牌協會噚晚舉行一年一度名人橋牌賽，世界冠軍福中都有參加，佢95年第一次嚟香港比賽，覺得香港人橋牌水平好高，可惜後生仔冇乜耐性學習，近年少見新秀。
同福中拍檔參賽嘅李家祥牌齡幾十年，早幾年因公務繁忙少玩，近年唔做議員重拾童年玩意，佢謙稱技術一般，所以要帶同太太助陣，「佢坐喺我身邊，我個心定啲，表現會好啲。」證監會非執行董事廖約克讀培正時學識橋牌，家每星期會玩兩日，佢係上年冠軍，希望今年冧莊。
土木工程拓展署署長蔡新榮都係橋牌發燒友，佢話橋牌四個人玩，唔似得捉棋，兩個人眼望望，多啲人傾偈冇咁悶。快將退休嘅佢話近年工作忙，好難抽時間玩，所以最想退休後多啲時間打橋牌。名人賽高手雲集，香港代表隊同女子國家隊教練[!8CBA]傳成都有落場，經過四輪比賽，最終由蔡國雄、[!8CBA]傳成、李新樂及黃光輝一隊奪標。