中央明確上海喺2020年發展成為國際金融中心，但作為上海市市長嘅韓正，竟然好坦白咁話：「全世界賺錢最沒良心的就是金融家」！佢講到明，話呢句說話係佢切身體會嘅結果，亦好明白咁樣講會得罪好多金融企業家，但點都要講出嚟。
指摘阻上海成國金中心
韓市長接受彭博資訊專訪時話，要達成上海作為國際金融中心嘅目標，最主要障礙之一就係金融家，佢話只要金融家唔製造障礙，佢完全有信心帶領上海超越香港、新加坡同東京，成為亞洲最具吸引力嘅金融城市。
佢好不滿金融家過份強調金融工具嘅槓桿作用同創新，將風險防範放喺次要位置。佢認為，中國應該發展監管體系同法制，對金融家過份強調弱肉強食嘅「動物本能」加以控制。
唔講金融，原來韓正如果唔係從政，佢最有可能係做音樂家，而肯定唔會做金融家。佢話曾經攞過上海音樂學院錄取通知書，如果當時入讀咗，家或者係音樂院院長。所以雖然佢公務繁忙，最近都抽出時間，去現場觀摩具有130幾年歷史嘅上海交響樂團全球樂手招聘。
李華華
mailto:[email protected]