純官挑戰權力及特權法世紀之戰前日開庭，雙方陣營都聘請英國御用大狀應戰，庭上高手過招固然目不暇給，庭內立法會秘書處晒馬霸位嘅壯觀情況更加令人大開眼界。
據知立法會秘書處一早向法庭預留公眾席兩行座位，畀議員、職員旁聽，秘書長吳文華一連兩日帶住十幾廿人去聽審，不過打官司係講道理唔係靠人多，秘書處此舉惹嚟唔少旁聽人士尤其係記者嘅怨言。不過呢班「啦啦隊」好禮讓，若有遲來議員想旁聽卻冇位坐，佢哋就會讓座。
公眾席座位有限，好多記者冇位坐，要坐去疑犯欄，議員吳靄儀睇唔過眼，直指秘書處咁做醜死怪，因為旁聽嘅秘書處職員只係普通市民，唔係法律代表，毋須預留咁多位，佢後來更讓座畀一位記者。據聞噚日下晝長毛旁聽都冇位坐，有職員識做起身，但長毛自稱煙癮大寧願企近門口，方便出去呼吸「清新」空氣。