以前一見到雙門車，個個都唔想先上車，梗係，雙門車後排總予人上落困難之感，女士着裙就最愁，要「爬」入後排，真係話咁易走光。如果見2+2座位就更加愁，後排空間例牌逼狹，要塞兩個大男人，簡直係匪夷所思！難得全新AudiA5Coupe入門版2.0TFSI大賣闊落後排，揸雙門車都唔使再「趕客」，仲送埋慳家優點！
記者：梁美甜
攝影：王文忠
Model：Joanne
坐後排無抗議
雙門車唔係跑車就係房跑格，A5就屬於後者，以2+2房跑車型登場。問以舒適好坐為揀車大前提嘅朋友，十個有九個半都對雙門車無好感，原因不外乎「後座趕客」。好彩今時今日，好多車廠已經一改以往後座逼狹嚇人嘅弊端，好似入門版A5Coupe就係其中一例，新車前座附有手動拉掣，可以從後將前座摺叠，再加有按鈕式電動軌，輕易將座椅趟前，要出入，後座乘客都有主導權，唔使下下求人，始終少咗啲被困嘅感覺。攞番主導權仲未夠，大隻少少都攝唔入亦係常見問題，A5一樣有計化解，兩扇門打開嘅角度超大，即使係健碩男，唔使打側身都可以輕鬆上落。而後排狹窄嘅弊點，A5都大有改善，後排兩個座位，稱得上超闊落，莫講話頭頂、膝及腳部空間都相當鬆動，連個子唔算小嘅Model跪上座椅，都唔頂頭！從此，坐雙門車後排再唔係苦事。
入門夠抵又玩得
A5並非Audi嘅新作，但入門版2.0TFSI就絕對係系列中新型號，事關代理以往只提供3.2公升車型，月前至正式引入2.0公升中型車，單係牌費同油費都已經同3.2型號相差一截，變相慳玩得多。你可能會懷疑：「慳咗等於無咁勁。」計我話，睇數字，加埋親自試揸，呢架入門版一樣好玩得，又豈止夠用！2.0公升TFSI引擎，馬力輸出最高達211匹，加上最高35.7kgm嘅扭力，無論起步還是加速，一樣可以表現狂放。入門車亦配有招牌quattro四驅系統同埋堪稱現時最快嘅雙Clutch波箱，即七速S-tronic自動波箱，以及附有加減波撥片嘅方向盤，操控就手，車輛嘅回應亦迅速兼靈敏，一個字：爽！以日用車而言，就算係入門版都算係超班！
AudiA5Coupe2.0TFSI 規格
引擎：1,984cc直四Turbo
馬力：211bhp/6,000rpm
扭力：35.7kgm/1,500-4,200rpm
傳動：七前速S-tronic自動波，quattro
售價：$528,000
查詢：合迪汽車（25281862）
