20歲人氣o靚模羅凱珊（Kama）有青春有身材，身邊自然不乏裙下之臣，大前晚記者便直擊Kama連環仔實錄，她先與前仁愛堂總理的公子袁紹恒睇戲開餐，再坐對方開篷Benz跑車到灣仔僻靜街角談心，密會近5小時後，火速換車換人，偕另一型男走進銅鑼灣一服務式公寓。昨日Kama一臉倦容出席澳門活動，聲稱她只是與朋友到公寓天台開party。
一身黑衣打扮及戴上黑帽的羅凱珊，大前晚（16日）7時與一白衣猛男在銅鑼灣行街街，二人沿途有講有笑打情罵俏，男的一時伸手㩒住Kama帽子，Kama則一度嬌羞地雙手蹺住男方手臂，態度頗為親熱。二人於7時40分往銅鑼灣的MCLJP戲院睇《LaughingGor之變節》，至9時半散場後，Kama笑笑口在手袋左摷右摷，掏出一張泊車票給白衣型男後，再齊齊往記利佐治街的停車場取車。
坐開篷Benz跑談心
原來大前晚偕Kama睇戲的猛男大有來頭，他是仁愛堂前總理的公子袁紹恒（Terry），家住半山梅道豪宅，家族經營玩具生意。Terry到停車場取回他的開篷跑車接載Kama離開記利佐治街後，將車再泊到附近銅鑼灣世貿中心停車場，然後往世貿中心13樓的桐燒嘆日本菜，逗留至晚上10時45分才離開。不過，Kama與Terry睇戲食飯似乎還未盡興，於是再驅車往陽明山莊，但未知何故二人抵達陽明山莊後又火速離開，再於11時半駛到灣仔星街，將車停埋一邊，然後Terry打開車篷跟Kama傾偈談心，傾足15分鐘始開車走人。
跟大隻佬直奔公寓
Kama乘Terry的Benz跑抵達銅鑼灣開平道後落車，然後火速登上另一部SmartForfour私家車，而司機則為一位大隻猛男。大隻猛男接載Kama直駛往銅鑼灣時代廣場停車場，之後再齊齊走進位於羅素街的Shama服務式公寓，記者通宵守候也未見Kama及猛男離開。
Kama昨日一臉倦容出席澳門舉行的撲克王名人慈善賽，記者致電向她了解大前晚連環仔一事時，她承認與Terry睇戲食飯，但就指二人只是朋友，她說：「我哋係朋友，唔係拍拖，所以冇可能喺街度拖手，可能咁啱見到我哋搭一搭啫。」記者指目睹二人到星街談心，未知對方可有追求之意？她說：「我唔知佢係咪追我，其實嗰晚我仲約咗另一個朋友，Terry車埋我去啫。」
「嗰度唔係時鐘酒店」
當記者問到Kama跟另一大隻型男入公寓一事時，她顯得頗為緊張，並急忙澄清說：「嗰個係我識咗年幾嘅朋友，係一個生意人嚟，嗰晚我哋約咗成班朋友喺嗰度天台開party，但我哋一早就離開，去咗跑馬地做腳底按摩，我有單據o架，大概1點幾佢就車我返屋企啦。」與男性友人入公寓，難道不怕人家誤會？Kama說：「唔會，嗰度唔係時鐘酒店，係serviceapartment，係高級地方嚟。」那麼大隻猛男可是追求者之一？Kama不置可否說：「佢兩個（Terry與大隻猛男）對我都好好，我唔排除將來同佢哋會有發展機會。」
採訪、攝影：李志明、楊浩賢、黃曉程、朱志聰、羅慧敏
人物誌：放貸嬌娃豬籠入水
大前晚被拍得同日車輪兩男的o靚模羅凱珊（Kama），現年20歲，07年因拍攝邦民財務廣告一炮而紅，成為炙手可熱的o靚模，入行兩年已由調景嶺公屋遷進月租過萬的翔龍灣，早前更推出寫真集，頗受歡迎。至於Kama的感情生活同樣多姿多采，去年先被拍得與光頭的米廠老闆密會，後來又與Square成員何尚謙（James）傳緋聞。
o靚模瞓身亂戰情場
o靚模由寂寂無聞少女踏入娛樂圈，誘惑多多好易搞到七國咁亂，Kama和Yumi就是人辦，不過也有專一如Angelababy，與陳偉霆玩足6年地下情仍不變。
尹蓁晞（Yumi）
早前被拍得與髮型師Jamie到時鐘酒店，更在公園交收金錢，之後她又與另一男子出入村屋，惹來援交疑雲。
鍾蕙芝（Lavina）
早前與身家逾億的衣架大王太子劉德俊傳緋聞，之後又拖6呎警察男友Alex晒命，但最近又被拍到北上行騷緊接陪老闆食飯兼推銷自己。
楊穎（Angelababy）
o靚界女神元祖Angelababy同陳偉霆（William）於03年因拍迪士尼特輯撻着，地下情玩足6年仍未換畫。
周秀娜（Chrissie）
周秀娜的模特兒男友Alvis為髮型屋老闆，對周秀娜體貼入微，就算女方出寫真及攬枕做電車男性幻想對象一樣全力支持。
資料來源：《蘋果》資料室