曾瀕臨破產邊緣、結果獲華府三番四次泵水拯救嘅美國國際集團（AIG）再次成為新聞焦點，佢哋新上任嘅舵手本莫施年薪原來有700萬美金，即約5460萬港紙，人工咁高，唔怪得佢上任就即刻飛去度假happy啦。
AIG話，本莫施份人工分兩部份，分別係300萬美金現金，同埋價值400萬美金嘅普通股，佢嘅工作表現理想嘅話，每年仲有機會獲派350萬美金花紅！但如果佢提早離職，就唔會再有離職補償。
雖然AIG使咗納稅人咁多錢，但依然改變唔到向舵手亂派錢嘅陋習，就算本莫施8月先返工，都有資格攞09年嘅特別花紅。AIG仲話，本莫施薪酬已得到總統奧巴馬委派嘅薪酬沙皇范伯格嘅approval，即係話已成定局，外人無得拗。