中聯辦副主黎桂康伴遊自由黨高層入西藏，傳出黎副主面授部署選舉機宜予自由黨嘅消息。八方從黨內渠道聽聞黎桂康此行仲有一個務在身，就係向自由黨提親，希望撮合田少拍住沙田區議員龐愛蘭2012年再戰立法會。
知情人士透露，西環撥行大葵扇似乎好想促成呢頭親事，黎桂康旅途上力倡田少東山再起，更提議讓龐愛蘭「嫁」入自由黨，納佢入宮後，下屆立會選舉排在田少之後出選。據講呢個媒人諗得好周詳，若然田少無意再玩，亦可由龐愛蘭帶領自由黨第二梯隊上陣，幫自由黨喺新界東留一點血脈云云。
拍檔再出選新界東
黨內消息指田少對西環提親冇明確表態，顯得十五十六欲拒還迎，事關龐愛蘭去年出選新界東，獲西環配票取得20,455票，就係因為佢走大量中產票令田少滑鐵盧，如果佢帶埋西環嗰兩萬票「嫁妝」入自由黨，連同田少擁躉嘅兩萬幾票，自由黨可穩取一席。加上有人落嘴頭，話如果田少高票當選，做多一屆議員先光榮引退，再交棒龐愛蘭，從政生涯畫上完美句號，豈不妙哉！
另一知情人士表示，早在年初政協會議期間，已有人喺北京向田少提出與龐愛蘭合作建議，唔知係冇興趣抑或覺得來日方長，田少當時冇乜反應，估唔到西環做媒人死纏爛打，趁西藏行重提此事，可見第二支管治隊伍絕無偷懶，國家幹部念念不忘為人民服務。
引狼入室後患無窮
好似《金枝慾孽》等老土電視劇情節，納妾入宮肯定多是非，現實亦然，小道消息話黨內有人為此好睇唔開，可能擔心被打入冷宮，仲激到病㖭，因此呢段政治婚姻最終能否成事變數甚多，田少固之然要諗清諗楚，做媒人嘅今勻要包生仔喎，真係大把手尾跟。好彩仲有三年先選舉，有時間畀雙方睇定啲，醞釀吓是否情投意合都未遲。
了解情況人士指呢件唔係喜事而係魔鬼交易，一旦接受西環安排引狼入室，自由黨日後選舉就由西環擺佈，反而龐愛蘭終於有個名份，唔使再做隱形左派。
mailto:[email protected]