就算幾怕辣，幾嚿水點隻避風塘炒蟹嚟吔，起碼都要微辣級先對得住自己同隻蟹。二十幾萬買架七人車返嚟招呼屋企人，後生又Sporty嘅嗲哋，點頂得順全原裝嘅一本正經。改裝名牌Wald睇中香港七人車大熱，推出一堆小辣改裝套件，左加右改老婆都唔會嫌飛仔，又滿足到行出街與別不同嘅虛榮感。
記者：徐影龍
攝影：楊錦文
Model：Chimpy@PureModels
小辣 LED霧燈夠招積
香港越嚟越多七人車，而且好多年輕家庭，甚至後生仔都出車。所以WaldHK負責人Ronald，就專登搵咗兩款七人車，作改裝Demo畀客睇，「有實物睇過覺得靚先裝，點都好過齋喺網頁睇相咁片面。」一架七人車要玩到天花龍鳳其實唔難，小辣得嚟保留番車款原味先夠勁。好似呢款HondaStepwgn咁，睇日本Wald網頁啲相，四四方方唔覺有乜特別，去到現場先親身感受到包圍Kit嘅魅力。頭尾泵把恰當嘅立體構造、兩盞LED霧燈仔、短彈簧LowDown車身，再加超靚19"P11C合金軨，令整架Stepwgn生猛不少。我最欣賞車櫳，換晒真皮加麖皮，紅線車格仔令車廂顯出點點Sporty味。「其實呢啲係Akantara（仿麖皮），真麖皮係會甩色，並非成本問題。真皮夾麖皮要貼服好考功夫，唔係一般車房做得到。」
微辣 內櫳有古典味
若果話之前架Stepwgn係小辣之作，咁豐田呢架ISIS，改裝只算微辣級數。因為着眼點係令佢更斯文靚仔，所以包圍Kit唔會起晒角咁誇張，只係適度加入立體層次，連裙腳、尾泵把都係適可而止，但加咗19"S21C五輻式合金軨，亦為ISIS增添不少醒目度，「咪睇套包圍唔算好複雜，其實Fit位好重要，有啲車行鍾意老翻日本改件，但成品有可能會唔啱位，灰補去救會唔夠平滑。有時亦會裝得唔夠實淨，結果會跌落嚟。」
內櫳方面，雖然座椅只包上啡色真皮，但手工一流，亦減低ISIS本身嚴重嘅膠感，啡色座椅亦帶有點點典雅味道。$8,500七個位換晒真皮，唔算貴，其他改件呢？「其實我哋有幫客訂埋車，若買架CompleteCar（車連改件），零件可以平番約15%。」
名廠改件專改名車
Wald喺日本改裝界頗有名氣，早年專改日系靚車，特色係包圍Kit設計獨特靚仔，但又唔會浮誇到似飛仔車，以豐富立體層次感作賣點，基本上好少見到Wald會裝埋大餐枱尾翼。用料夠靚夠硬淨，睇價錢，可算係較高級嘅改裝牌子。近年Wald開始轉戰歐洲名車，由Benz、寶馬到Bentley都有專門改裝Kit。
查詢：WaldHK（28388410）