昨日大跌市，做節目時收到的電話特別多，聽散戶反應有如市場探熱針，與《蘋果》搞開嘅散戶指數調查有異曲同工之效。結果真係「估你唔到」，大市錄得8個月最大跌幅，散戶反應不但冷靜非常，而且絕大部份係問幾時溝貨。
係問溝貨，唔係問撈底，要溝即係話喺高位經已蟹咗，可見坊間說「未派夠貨」之論未必成立。市場變化之快，經已今時唔同往日，如今派貨快、股價挾高更快，派少咗貨唔緊要，沽到好價莊家自然收貨。
之前苦口婆心同大家講，上證綜指穿3200已經要小心，天曉得一日之內連環跌穿3000及2900兩個心理關口，10個交易日自高位回調17.5%，雖然有成411隻股份跌停板，但好在有停牌機制，否則骨牌式人踩人，後果不堪設想。
今天光大證券登陸上海交易所，到底中籤率只有0.81%、市盈率高達58倍（歷來第5高），集資額過百億元人民幣嘅佢，會否出現「破發」嘅尷尬場面十分重要。似曾相識燕歸來，光大控股（165）用15個交易日跌去15.3%，再次證明炒母憑子貴都係要趁單刁鬥入直路見好即收。
跌勢過急小心後抽
內地充份發揮股市理論嘅鐘擺效應，升就升過龍，跌亦跌到阿媽都唔認得，好大程度係同股民嘅成熟程度及市場供求有關。內地錢多股少，外資分到投資配額亦有限，基金又好，散戶都好，惟有透過A50中國基金（2823）撈底。
睇市面A50牛仔街貨，市場似乎信心唔錯，喺發行商那邊八到，近幾日流入嘅4000幾萬資金，昨日大跌市不但無被震走，反而左手買入A50，右手Call多隻A股指數重磅股中石化（386），炒家目標顯而易見。用窩輪嘅啟示性比牛證更好，因為可以剔除睇錯市而被收番嘅資金。
上證綜指9日內跌近兩成，其間兩度反彈未成，但當大家絕望之際，想想移動平均線之萬有引力，鐘擺得越過火，調整過後之反彈越狠，唔好睇小反彈空間，對股市新丁及高追不遂股民而言，生死就在一線間，50日線反彈阻力在3105，當9RSI已屆21、STC跌至11%，現在才睇淡已太遲，10日線今天還處於3220，短期跌勢過急，挾一挾番上去唔出奇。
胡孟青