早飛版之〈美洲戰場〉首次同大家見面，巴甲當然係本欄嘅主流，睇勻呢個周三快車期嘅戲碼，最穩陣相信係復晒蘇嘅聖保羅，主場大炒富明尼斯，主W同「大」要實。（球賽編號：星期三28；香港時間周四8:50am開賽）畢傑
巴甲季初嗰陣，好多球評家都覺得聖保羅好難力爭聯賽4連霸，事關頭10場成績，差到只得2勝5和3負，排名更長期排於12至14位。不過，聖保羅近8場7勝1和，對上6戰更加係贏晒；既然順開有條路，周三對住頹到爆嘅富明尼斯，大勝可期。
華盛頓連續3場入波
聖保羅上場2:1險勝利斯菲體育會，有份建功嘅射手華盛頓已連續3場有波入，場波雖然有巴西國腳祖奧米蘭達同雲拿度領紅被逐，今場齊齊停賽；但上仗由B隊提升上A隊嘅阿根廷右閘阿祖安干沙利斯表現對辦，賽後獲教練列卡度高美斯大讚。再者，另一防守大將桑洛特繼上場停賽後可復出，防線又有暫代隊長安德里戴亞斯鎮守，兵源充足。
前線方面，華盛頓、佐治韋拿與靴蘭尼斯等主力全可披甲，而上仗因累積3面黃牌無緣對利斯菲嘅大勇射手達高巴圖，同樣喺呢場波停賽復出，陣容「夫添」到痺；加上門將羅渣里奧聽講就嚟傷癒可歸隊，就算3號門將保斯高同樣養緊傷，仲有丹尼斯施薩呢個副選龍門嘛！
富明尼斯作客未贏過
客軍富明尼斯就慘喇，當經驗射手費特仍然因傷缺陣，前線有時要擺兩位o靚仔基沙同阿倫杜格拉斯，有時又要出老將洛尼山度士，聖保羅對住呢類組合實在冇有怕。再講，富明尼斯聯賽作客3和6負，到訪國際體育會同哥連泰斯都要被炒4:2，對6連勝嘅聖保羅點可全身而退？
早飛貼士
主客和：星期三28聖保羅勝（1.42）
半場主客和：星期三28聖保羅[半勝]（1.9）
波膽：星期三28聖保羅勝4:1（17）