民建聯升呢訪粵團日前返港，13個珠三角城市都對升呢團高度重視，派出主要領導高規格接待，招呼相當唔錯。特區近年強調要同內地合作，團長譚耀宗引述內地城市領導話，特區政府政策醞釀過程好長，但一旦拍板就可以去馬去得好快。
譚Sir冇評論內地官員說話有乜含意，八方聽落似乎有啲明煲暗貶，可能內地高官睇唔順眼特區乜都要諮詢，唔似得佢哋一言堂說了算。深港兩地表面合作大於競爭，但深圳市喺蛇口赤灣興建嘅巨型國際郵輪碼頭全速上馬，擺明要同特區搶客，民建聯認為值得留意對香港有幾大影響，身為深圳市政協嘅民記秘書長彭長緯應該向深圳市收收風。