台灣災情嚴重，慢半拍嘅特區政府決定動用5,000萬元賑災，立法會財委會噚日開特別會議表決。人命關天下撥款肯定獲議員支持，但八方聽聞政府都腳震，原來驚議員暑假外遊未返，點人頭約得30多人可以開會，萬一有一、兩個人冇到隨時流會，所以財經事務及庫務局都mark實議員，不容有失。
立法會秘書處亦一早call定在港議員務必出席，結果身兼港區人大嘅黃國健同葉國謙等都要留守議事廳，無緣以人大身份去政府總部向煲呔就施政報告發表意見。財委會最終無驚無險通過撥款，議員意見大同小異，葉太同Tanya悶到發呆。馬會亦緊急捐出1,000萬元支援台灣救災。