特首煲呔同太太放咗個幾星期大假，噚日返工，開始就施政報告諮詢各界意見，首先見18個港區人大，港區人大陳智思會後話，政府振興六大產業時要好好考慮土地供應問題；另一名港區人大鄭耀棠則向煲呔建議，住在內地嘅港人申請生果金不應有限制，棠哥又幫港商申訴，有啲人因為財政糾紛被扣回鄉卡，希望港府協助。
想同內蒙古更多合作
煲呔放假期間都冇放低工作，同內蒙古自治區黨委書記儲波、自治區黨委副書記、自治區主席巴特爾等官員見面，煲呔指內蒙古幅員遼闊，資源豐富，有十分廣闊嘅發展前景，相信同香港發展經貿合作有巨大發展空間。
「孤獨的推銷員」話港府支援工商界人士到內蒙古投資興業，亦希望內蒙古更多企業到香港上市。煲呔帶頭去內蒙旅遊，八方聽聞本地政界近來都興起內蒙熱，棠哥亦啱啱喺內蒙回港冇耐，受當地風光吸引，佢今年冇參加人大江西考察團。