站喺同一個運動比賽平台較技，電光火石間從來冇人敢話贏梗；強如高球巨人活士，也可以被寂寂無聞嘅南韓球手偷雞成功，今屆喺4大滿貫賽食白果。當然長期處於高水平比賽三五七年，一時失意唔代表甚麼，英超Big4也只會是輪流威，巴塞皇馬都係，但降落到英冠嘅名牌英超大會，就唔係咁容易喺狂龍亂舞下翻身，今日我要捧米堡對家，斯肯索普下盤。
斯軍主場不敗率高
一支剛從英甲附加賽升上，一支卻從英超大舞台倒下，照計，差兩班，應該冇得打；但貼波買波不能單計死數，斯肯索普個東部細場僅坐9,000人，呢班波主場一向特勁，前季降班前在英冠也有65%不敗率；有睇過英冠直播都知，踢英冠場數又多啲、場地又一般，最重鬥志體力，一班身嬌肉貴嘅米堡球星跌落「地獄」勢吃盡苦頭，作客要讓波，我睇唔易贏。
另外，歐聯外圍賽今晚「有線」有得睇，我都好恨睇愛隊踢波，驚佢哋呢圈出局冇得睇，不過暫冇咁嘅衝動裝番；要賭，大家留意，近3季最後一圈外圍賽首回合主隊勝率都唔高，上兩季16場更僅錄得7勝。今個周中足智彩全開10場，要我揀，只獨取史特加客W。
（下次見報日：周三）
文：Leung
簡介：不理盤路，不信陰謀論，最重勤力睇波，跟足軍情，吼準一擊。
今日精選
星期二5史特加勝(1.9)
星期二16斯肯索普下(1.87)
簡評：周中波從來不易估，今天分兩注出擊減低風險。