八折黨肆虐的士界，唔係咩新鮮事，自從短加長減實施後，大長途已經有近80%優惠，八折黨仲畀折頭根本無肉食，最大作用只係唔想托熟客手踭啫。其實箍客有好多方法，唔知大家有無發覺，近排的士佬待客態度改善咗好多，最主要係有唔少年輕生力軍加入，態度較溫文同有禮貌，無晒傳統的士佬嗰種麻甩味。黃師傅坐過一位廿零歲後生仔嘅的士，除咗有齊早晨、好呀、多謝、小心等關心字眼外，沿途識得講笑講時事，整個車程融洽愉快，最後遞上卡片一張，請黃師傅多多關照。睇番張卡片，設計新潮搶眼，背面仲有英文，講明觀迎外地遊客，咁多生意佬同行政高層飛嚟飛去，招呼得好嘅真係唔憂做。咁醒嘅後生仔，抵佢有運行。睇嚟我黃師傅都要諗諗計換吓新作風先得喇！
文：黃師傅