天生我才必有用，冲茶一樣可以冲出個未來。酷男奶茶王陳偉聰日前喺第一屆金茶王大賽奪得個人組「奶茶之王」美譽，可惜喺參賽期間疑因花時間備戰被炒，家佢冲茶封王，唔知舊老闆有冇大嘆走寶呢？
要靠味覺加創意
據講陳偉聰家陣要打散工，不過佢冲茶一顯身價，應該唔使憂。八方聽聞有大集團對佢有興趣，慧眼識英雄嘅係捷榮咖啡，據知佢哋新設「專業紅茶師」（TeaMaster）職位，早前已經喺海內外獵頭請奶茶專家，可惜呢個世界紅酒專家、咖啡專家好多，研究奶茶嘅卻少之又少。
八方收到料，求才若渴嘅捷榮咖啡知道陳偉聰封為奶茶王消息後，即刻搵人搭路聯絡對方，睇吓雙方有冇合作機會，不過據悉捷榮仲未正式決定是否同陳生面試，更遑論係咪請佢返工，不過咁，凡事總要行出第一步，奶茶王獲得賞識，憑住冲茶絕技，日後應該大把前途。
香港人年飲九億杯奶茶，好多人自認奶茶專家，何解咁難搵一個「專業紅茶師」呢？捷榮家有專業咖啡師負責研製咖啡新產品，據八方了解，紅茶師入職要求唔簡單，唔只需要識冲奶茶，仲要識得所有紅茶嘅種類，又要對將唔同茶葉溝埋一齊調配出不同味道有心得，學歷反而唔係咁重要，最緊要嘅係創意，有能力開發新產品。
以市面嘅飲品新產品為例，好似可樂變龍鳳檸樂，利賓納變凍檸賓咁，都係靠味覺加創意而成，TeaMaster要為調配最順喉奶茶花心思，據知呢個職位人工都唔錯，應該唔會少過茶餐廳做水吧啩。
「問一句答一句」嘅酷男陳偉聰得悉冲茶技術獲賞識，表現得冇咁酷，問一句答兩句，願意透露自己對茶葉嘅認識。
佢指茶葉因濕度有別而分乾天茶、雨天茶，兩種茶葉冲出嚟嘅味道有唔同，又話雖然未做過專業紅茶師，但躍躍欲試，「可以試吓新嘢，都幾好。」雖然佢冲茶封王，但係冇冲昏頭腦，「唔好講咁多住，做到先算啦。」
mailto:[email protected]