杜琪峯執導、法國老牌歌星JohnnyHallyday、黃秋生、林雪同林家棟主演嘅新片《復仇》會喺後日上映，呢部槍戰片有唔少戲份都喺旺角街頭拍，早前林雪喺旺角街頭拍追逐戲時，仲拍到心臟病發，工作人員即刻送佢入醫院。
秋生把脈開玩笑
林雪一向有心臟病同血壓高，杜琪峯仲叫佢拍追逐戲，仲唔停咁重拍好多次，搞到肥雪頂唔住倒地。秋生見佢面青口唇白，即刻同佢把脈，當時秋生仲半開玩笑話：「佢應該唔得啦！」嚇得杜琪峯話等佢唞番順條氣後，即刻送佢入院！事後阿杜話：「佢肥成咁，又唔肯做運動，食嘢冇節制，我咪諗住幫吓佢，拍戲時畀佢跑多幾轉，點知佢跑到休克兼心臟病發。」
林雪被送到醫院檢查後，醫生都叫佢要減肥同食降血壓藥，仲話唔可以做劇烈運動，肥雪噚日同馮仁昭講：「係自己衰嘅，又唔理自己身體狀況，杜Sir勸過我好多次要減肥又冇聽，家為咗自己身體同工作着想，真係要決心減磅啦！」
