恕我求大俠想像力豐富，前晚睇熱刺對利物浦場波忽聞燶味，幾驚部電視機出煙；索真啲，原來唔係燶，係，啲「味」係嚟自輸波嘅紅軍。利物浦輸1:2唔緊要，成Big4唯一輸波都算，但喺場內發生嘅醜事，爆！
紅軍開「咧」第一擊作客熱刺，冇咗沙比阿朗素但有名牌效應，結果仲夠膽死要讓盤。一落場就見真章，堂堂紅軍衰到上半場得一次射門，俾人㩒住踢，只係俾伊高圖攻入一球已經要裝香還神。戰況唔講，開波初段就發生史卡迪爾同加歷查爭頂，結果火星撞地球，一個爆顎，另一個傷額頭，要變身白頭摩囉負傷作賽，夠啦啩？
賓帥窒球證做小丑
下半場紅軍有起色，仲由謝拉特射入12碼扳平，不過冇耐又被人頂入，頂輸嘅係白頭摩囉加歷查，頂贏嘅係由降班隊紐卡素加盟（即係本來係英冠仔）嘅巴桑，又係一。成場波，紅軍後備席都好躁，對於伊高圖一次整低禾路連，同一次手球而冇判12碼，結果助教李森美因為投訴被趕埋出場，而舉報佢嘅第4球證只得27歲，領隊賓尼迪斯就話人太年輕，有關係咩？
紅軍場波輸得幾難睇，但原來好戲在後頭，賓尼迪斯喺記招上批評球證，仲喺衫袋入面攞副眼鏡出嚟，意思大概係窒球證睇得唔清楚，引嚟哄堂大笑，連小丑都做埋，除非佢係博做眼鏡公司代言人，否則個動作查實都幾。
列納寸紅軍唔同樣
另一邊廂，哈利列納就出招，一方面唔同意兩個問題球要判12碼，同時明寸紅軍，估唔到可以贏得咁輕鬆：「上季我哋又係贏2:1，但當時係紅軍佔盡優勢，今次情況就啱啱相反，以為佢哋上季嚟到輸過波，今次會畀更多壓力我哋。如果把握得好啲，我哋半場應該已贏兩球。」輸波事小，被人明寸冇「飛士」就事大，賓帥今次同隊波一齊咗，希望唔會一鋪被打謝啦。